Hollande tekur við 15. maí

Francois Hollande mun taka við sem forseti Frakklands af Nicolas Sarkozy hinn 15. maí næstkomandi, samkvæmt upplýsingum frá forsetaembættinu. 

Var þetta niðurstaða í viðræðum kosningastjóra Hollandes, Pierres Moscovicis, og starfsmannastjóra Sarkozys, Xaviers Musca, í morgun. Sarkozy tilkynnti stuðningsmönnum sínum í gærkvöldi að hann ætlaði ekki að leiða flokk sinn í komandi þingkosningum og að hann myndi hætta í stjórnmálum eftir að hafa orðið undir í seinni umferð forsetakosninganna í gær. Hollande fékk tæplega 52% fylgi í kosningunum í gær.

Karl Blöndal fór yfir æviferil Francois Hollande í Sunnudagsmogganum um helgina. Þar kom fram að Hollande fæddist í Rúðuborg 12. ágúst 1954. Móðir hans var félagsfulltrúi og faðir hans læknir. Til þess er tekið í æviágripum að faðir hans hafi boðið sig fram fyrir hægri öfgamenn. Talið er að eftirnafn hans sé komið frá forfeðrum sem voru kalvínistar og flúðu frá Hollandi á 16. öld. Þeir hafi tekið nafnið upp þegar þeir komu til Frakklands.

Hollande á sér langan feril í franska Sósíalistaflokknum og hefur gegnt ýmsum ábyrgðarstöðum innan hans, en ekki setið í mikilvægum embættum utan flokksins, sem andstæðingar hans hafa sagt að sé til marks um reynsluleysi.

Hollande var orðaður við forsetaframboð í 2007, en stuðningur hans við samþykki við stjórnarskrá Evrópu, sem var felld í þjóðaratkvæði, átti þátt í að skemma fyrir honum. Svo fór að þáverandi maki hans, Segolene Royal, varð frambjóðandi sósíalista og tapaði hún gegn Nicolas Sarkozy. Hollande og Royal eru nú skilin.

Fall Dominiques Strauss-Kahns, fyrrverandi yfirmanns Alþjóðagjaldeyrissjóðsins, þegar hann var sakaður um kynferðislegt ofbeldi við starfsmann hótels í New York, greiddi götu Hollandes.

Hollande hóf hins vegar forsetaframboð sitt í raun fyrir tveimur og hálfu ári. „Ég held að það sé kominn tími fyrir venjulegan forseta,“ sagði hann þegar hann var staddur í Alsír í desember 2010. Staða hans var hins vegar ekki góð. Hann gegndi þá ekki forustuembætti í flokknum, þótti ekki hafa sterkt bakland þar og var talinn litlaus. Áður en hann var gerður að frambjóðanda flokksins sögðu 17% Frakka að hann væri gott forsetaefni og var hann fimmti og var langt á eftir Strauss-Kahn. Hollande hélt hins vegar ótrauður áfram baráttu sinni og þegar Strauss-Kahn var úr sögunni skaust hann fram fyrir önnur efni í flokknum og skoðanakannanir fóru að sýna að hann hefði jafnvel meira fylgi en forsetinn.

Francois Hollande ásamt unnustu sinni Valerie Trierweiler Reuters

• Blogga um frétt