Merkel býst við góðum samskiptum

Angela Merkel, kanslari Þýskalands, segist sannfærð um að sér muni takast að mynda traust samband við Francois Hollande, nýkjörinn forseta Frakklands, þrátt fyrir að hún hafi stutt dyggilega við Nicolas Sarkozy, fyrrverandi Frakklandsforseta.

Hollande tekur við embætti á þriðjudaginn og mun að athöfninni lokinni fara til fundar við Merkel í Berlín og ræða þar kreppuna á evrusvæðinu.

Þá hefur Hollande rætt við Vladimir Pútín, starfsbróður sinn í Rússlandi, um að þeir fundi á næstunni. Báðir hyggjast þeir fara á ráðstefnu G20-ríkjanna í Mexíkó í næsta mánuði.

Utanríkisráðherra Írans, Ali Akbar Salehi, fagnar kjöri Hollandes og segist vonast til að samskipti Írana og Frakka verði önnur og betri með nýjum forseta, en Frakkar studdu refsiaðgerðir Bandaríkjamanna gegn Írönum dyggilega. Aðgerðunum var komið á vegna kjarnorkuáætlunar Írana og tilrauna þeirra með kjarnavopn.

• Blogga um frétt