Handtóku „kanadíska brjálæðinginn“

 Lögreglan í Berlín hefur handtekið mann sem talinn er vera morðingi sem kallaður er „kanadíski brjálæðingurinn“ í fjölmiðlum. Maðurinn, Luka Rocco Magnotta, hefur verið eftirlýstur fyrir að drepa kærasta sinn og brytjað hann niður. Á hann að hafa kvikmyndað athæfið að auki.

„Ég get staðfest að maðurinn sem við handtókum er hinn eftirlýsti Magnotta,“ segir talsmaður lögreglunnar í Berlín.

Fyrr í dag komst franska lögreglan á snoðir um að hugsanlega hefði Magnotta farið frá París, þar sem hann er talinn hafa leynst frá því á föstudag, með rútu eða lest. Hafði starfsmaður á umferðarmiðstöð borið kennsl á manninn.

Magnotta hefur verið kallaður „kanadíski brjálæðingurinn“ (e. Canadian Psycho) vegna myndbands sem talið er sýna hann stinga annan mann með ísnál og skera lík hans svo niður. Undir myndbandinu er leikin tónlist úr kvikmyndinni American Psycho.

Interpol hóf í síðustu viku að leita Magnotta en hann gengur einnig undir nöfnunum Eric Clinton Newman og Vladimir Romanov. Hann er m.a. þekktur fyrir að hafa leikið í klámmyndum.

Meint fórnarlamb Magnotta er Lin Jun en þeir áttu í ástarsambandi.