Faðir myrti fjögur börn sín

Lögregla í Þýskalandi segir að hún hafi í dag fundið lík fjögurra barna á aldrinum 5-12 ára. Faðir barnanna er grunaður um að hafa myrt börnin. Hann reyndi sjálfsvíg eftir verknaðinn.

Lík barnanna fundust á heimili þeirra í bænum Ilsede í Saxlandi. Börnin fundust í rúmum sínum. Þau vorum fimm, sjö, níu og tólf ára.

Faðir barnanna, sem er 36 ára gamall, fannst með alvarlega áverka, en talið er að hann hafi reynt sjálfsvíg. Hann var fluttur á spítala.

Lögreglan segir að foreldrar barnanna hafi verið að ganga í gegnum skilnað. Móðir barnanna hafi verið á ferðalagi erlendis og fengið SMS-skeyti frá manninum þar sem hann sagðist hafa myrt börnin. Konan hafði strax samband við lögreglu. Hann mun einnig hafa skilið eftir sig bréf þar sem hann segist ekki geta lifað án barnanna.