Geta ekki sinnt störfum sínum

Eftirlitsmenn frá Sameinuðu þjóðunum þurfa að hætta störfum sínum þar sem ofbeldið í landinu stigmagnast nú dag frá degi. Skotið hefur verið á eftirlitsmennina og þeim gert mjög erfitt fyrir að skoða afleiðingar borgarastyrjaldarinnar sem nú geisar í Sýrlandi, segir í frétt á vef Sky fréttastofunnar.

„Eftirlitsmennirnir munu ekki halda áfram starfi sínu og munu halda kyrru fyrir þar til annað  kemur í ljós,“ er haft eftir Robert Mood sem fer fyrir eftirlitshópnum.

Um 300 óvopnaðir eftirlitsmenn á vegum Sameinuðu þjóðanna eru í Sýrlandi og eiga að fylgjast með því að vopnahléi, sem samið var um 12. apríl, sé framfylgt. Stríðandi fylkingar hafa hins vegar gert þeim erfitt fyrir enda hefur vopnahléið ekki verið virt.

Frá því að samið var um vopnahlé hafa hundruð manna fallið í átökunum í landinu, þar á meðal fjöldi barna í óhugnanlegum fjöldamorðum í þorpum landsins.

Þá var skotið á bíl eftirlitsmannanna í síðustu viku og komust þeir ekki strax til eins þeirra þorpa þar sem voðaverkin voru framin.

Skotið var á bíla eftirlitsmanna Sameinuðu þjóðanna í Sýrlandi í síðustu viku. Einnig var grjóti og öðru kastað að fólkinu. AFP

• Blogga um frétt