Spænsk stjórnvöld hafa vakið hörð viðbrögð kvenna en þau fyrirhuga að herða lög um fóstureyðingar. Nái breytingarnar fram að ganga verða eyðingar á vansköpuðum fóstrum bannaðar.
Árið 2010 var lögum um fóstureyðingar breytt og þær almennt heimilaðar að 14. viku meðgöngu. Þá var einnig bundið í lög að fóstureyðing mætti fara fram á allt að 22. viku meðgöngu ef heilsu móður væri ógnað eða ef fóstrið væri alvarlega vanskapað.
En í síðustu viku tilkynnti jafnréttisráðherrann Alberto Ruiz-Gallardon að hann væri á móti eyðingu vanskapaðra fóstra.
„Ég skil ekki af hverju við ættum að eyða fóstrum af þeirri einu ástæðu að þau eru fötluð eða vansköpuð,“ sagði hann. Á föstudag útskýrði hann sjónarmið sín enn frekar og vitnaði m.a. til sáttamála Sameinuðu þjóðanna um að þjóðir heims gerðu allt sem í þeirra valdi stæði til að tryggja réttindi fatlaðs fólks.
Nú fara fram í Madríd mótmæli sem kvennasamtök hafa efnt til vegna fyrirhugaðra breytinga á lögum um fóstureyðingar.
Í yfirlýsingu frá samtökunum kemur fram að breytingarnar myndu færa lögin aftur til einræðistíðar Francos og að með þeim myndi Spánn skera sig úr öðrum Evrópuþjóðum hvað kvenréttindi varðar.