Sprengja á vegi í suðurhluta Afganistans varð sex óbreyttum borgurum að bana, aðallega konum og börnum, sögðu lögregluyfirvöld í landinu í dag.
„Tvær konur, þrjú börn og einn karlmaður létust af völdum sprengjunnar,“ sagði í tilkynningu frá lögregluyfirvöldum í Spin Boldak-héraðinu nálægt landamærum Pakistan. Frá þessu hermir AFP-fréttastofan…
Það var enginn sem lýsti strax yfir ábyrgð á verknaðinum, en sambærilegar vegasprengjur eru oftast á ábyrgð talibana sem eru í uppreisn gegn stjórn sitjandi forseta landsins, Hamids Karzai.
Sameinuðu þjóðirnar segja að 1.145 óbreyttir borgarar hafi látið lífið og 1.954 hafi særst í átökum í landinu á fyrstu sex mánuðum þessa árs.
Sameinuðu þjóðirnar kenna uppreisnarmönnum í landinu um 80% dauðsfallanna og að um helmingur þeirra hafi verið af völdum vegasprengja.
Atlantshafsbandalagið hefur um 130.000 hermenn í landinu til aðstoðar þarlendum stjórnvöldum í baráttunni við talibana.