John Kerry, utanríkisráðherra Bandaríkjanna, sagði í dag að stjórnvöld í Washington væru „skuldbundin að fullu“ til þess að verja Japan. Orð Kerrys koma í kjölfar hótana Norður-Kóreumanna um að Tokýóborg yrði „umvafin kjarnorkueldi“.
Kerry lét ummæli sín falla á fréttamannafundi í Tokýó ásamt kollega sínum, Fumio Kishida. Búist er við því að Norður-Kóreumenn muni skjóta eldflaug á loft á næstunni. KCNA, ríkisútvarp Norður-Kóreu, lýsti því yfir á föstudaginn að ef Japanar reyndu að skjóta niður eldflaugina myndi það þýða stríð. „Japan er alltaf í skotlínu byltingarhers okkar og ef Japan hreyfir litla fingur munu logar stríðsins snerta Japan fyrst,“ sagði í fréttaskýringu ríkisútvarpsins.
Japan er eina landið sem orðið hefur fyrir kjarnorkuárás. Her landsins hefur sett upp eldflaugavörnum í kringum höfuðborgina Tokýó og lofað því að brugðist verði við öllum hugsanlegum aðstæðum sem upp gætu komið.