Utanríkisráðherra Bandaríkjanna, John Kerry, hefur brugðist við ásökunum um að Bandaríkjamenn hafi njósnað um bandamenn sína með því að segja slíka starfsemi ekki „óvenjulega“ í alþjóðasamskiptum. Öll ríki heimsins gripu til ýmissa aðferða til þess að vernda þjóðaröryggi sitt og það kallaði á allskonar upplýsingar. Hins vegar vildi hann ekki tjá sig nánar um málið fyrr en hann hefði gert sér nákvæmlega grein fyrir stöðu málsins. Þetta kemur fram á fréttavef breska ríkisútvarpsins BBC.

Upplýsingar um að Bandaríkin hafi njósnað um bandamenn sína í Evrópu, þar á meðal Evrópusambandið, Frakkland, Ítalíu og Grikkland, hafa vakið mikla reiði en þeim var lekið af fyrrverandi starfsmanni bandarísku leyniþjónustunnar CIA, Edward Snowden, sem talinn er vera enn á flugvelli í Moskvu eftir að flogið þangað frá Hong Kong fyrir rúmri viku.

Evrópusambandið hefur meðal annars varað við því að upplýsingarnar kunni að hafa neikvæð áhrif á fyrirhugaðar viðræður sambandsins við Bandaríkin um fríverslun sem hefjast eiga á næstunni. Haft er eftir Viviane Reding, dómsmálastjóra Evrópusambandsins, í fréttinni að samstarfsaðilar njósni ekki hverjir um aðra. Ekki verði hægt að fara út í slíkar viðræður sé einhver grunur um að Bandaríkjamenn hleri skrifstofur sambandsins. Fleiri forystumenn innan Evrópusambandsins hafa tekið í hliðstæðan streng.

Forseti Frakklands, François Hollande, krafðist þess í dag að Bandaríkin hættu að njósna um evrópskar stofnanir. „Við getum ekki sætt okkur við svona hegðun á milli samstarfsaðila og bandamanna,“ sagði hann við blaðamenn samkvæmt frétt AFP. „Við förum fram á það að þessu verði samstundis hætt.“

Tengdar fréttir

Edward Snowden

Snowden fær rússneskan ríkisborgararétt

• Njósnuðu um Hvíta húsið
• Hjálpuðu Snowden og er synjað um hæli
• Í hættu eftir að hafa aðstoðað Snowden
• Segja lögregluna á hælum sér

» Fleiri tengdar fréttir

• 1 blogg um fréttina

Bloggað um fréttina

• Ragnar Geir Brynjólfsson: "Heiðursmenn lesa ekki hver annars póst"