Lögreglan í Leeds í Bretlandi hefur handtekið 33 ára karlmann eftir að tveir hundar hans réðust á konu sem lést síðar af sárum sínum. Hundarnir eru af tegundinni pitbull terrier. Konan var fjögurra barna móðir.
Konan lést í gærkvöldi. Samkvæmt fréttum Sky-sjónvarpsstöðvarinnar fékk konan flogakast og réðust hundarnir á hana á meðan því stóð. Hún var 27 ára gömul.
Eigandi hundanna var handtekinn á grundvelli laga um meðferð hættulegra hunda, Dangerous Dogs Act. Samkvæmt þeim lögum er hald hunda af tegundinni pitbull terrier háð miklum takmörkunum.