Þing Úkraínu afturkallaði í morgun umdeild lög, sem sett voru fyrir skömmu sem takmarka mjög rétt almennings til mótmæla. Stjórnarandstæðingar segja afsögn Mykola Azarov forsætisráðherra aðeins skref í átt að sigri stjórnarandstæðinga.
Azarov sagði af sér í morgun og sagðist vonast til þess að það yrði til að greiða fyrir friðsamlegu samkomulagi á milli stjórnar og stjórnarandstöðu. Forseti landsins, Viktor Janúkovitsj, hefur enn ekki samþykkt afsögnina.
Afsögnin var meðal krafna stjórnarandstæðinga, en þeir krefjast einnig að forsetinn segi af sér og að boðað verði til kosninga í landinu. „Þetta er ekki sigur. En þetta er skref í átt að sigri,“ sagði Vitali Klitschko, fyrrverandi heimsmeistari í þungavigt og einn leiðtogi stjórnarandstæðinga, í morgun.
Lögin umdeildu voru felld úr gildi með 361 atkvæði gegn tveimur. Þau voru samþykkt 16. janúar síðastliðinn og var þeim ætlað að stemma stigu við mótmælum stjórnarandstæðinga. Þau urðu aftur á móti til þess að mótmæli jukust til muna og harka hljóp í þau. Samkvæmt lögunum lágu þungar fangelsisrefsingar við mótmælum í opinberum byggingum og við því að hylja andlit sitt við mótmæli.