Erlent | mbl | 29.1.2014 | 9:04

Óttast mænusóttarfaraldur í Danmörku

Með bólusetningu er komið í veg fyrir mænusótt. mbl.is/Sigurður Jökull

Hætta á mænusóttarfaraldri í Danmörku er nú raunveruleg vegna þess að sífellt fleiri foreldrar kjósa að láta ekki bólusetja börnin sín. Dönsk yfirvöld ættu að grípa tafarlaust til aðgerða. Þetta segir formaður landssamtaka þeirra í Danmörku sem skaðast hafa af völdum veikinnar.

„Það þarf að auka áherslu á það við foreldra að þeir láti bólusetja börn sín gegn mænusótt,“ segir Holger Kallehauge sem er formaður PTU, landssamtaka mænusóttarsjúklinga og þeirra sem slasast hafa í umferðarslysum, í samtali við danska ríkissjónvarpið DR.

Lægsta hlutfall bólusettra í Danmörku

Í fyrra breytti alþjóða heilbrigðisstofnunin WHO áhættumati fyrir mænusóttarfaraldur í Danmörku úr lágu í meðalhátt vegna þess að sífellt færri dönsk börn eru bólusett fyrir sjúkdómum á borð við mænusótt. Hlutfall bólusettra barna er 89-91%, en til þess að árangur bólusetninga sé fullnægjandi og veiti þá vernd í samfélaginu sem hún á að gera, þurfa 95% að vera bólusett, að sögn Robs Butler sem starfar á skrifstofu bólusetninga og ónæmis hjá WHO. Hann segir að í Danmörku sé lægsta hlutfall bólusettra á Norðurlöndunum og á löndum á Balkanskaganum.

Íslensk börn eru bólusett fjórum sinnum

Mænusótt er líka kölluð lömunarveiki. Afleiðingar sjúkdómsins geta m.a. verið vöðvalömun í baki og útlimum. Á vef embættis landlæknis segir að um sé að ræða afar smitandi sjúkdóm og byrjað hafi verið að bólusetja fyrir mænusótt árið 1955.

Hér á landi eru börn bólusett við þriggja, fimm og tólf mánaða aldur og endurbólusett 14 ára. Bóluefnið endist ekki lengur en í tíu ár og því er möguleiki á að smitast síðar á ævinni. Því er mælt með að fullorðnir láti bólusetja sig gegn mænusótt á 10 ára fresti ef þeir ferðast til landa þar sem hætta er á smiti.

Vilja rannsaka klóakvatn

Undanfarna mánuði hafa mænusóttartilvik greinst í Sýrlandi, en Danmörk hefur tekið við flóttafólki þaðan. „Þess vegna er smithættan meiri en áður,“ segir Kallehauge og bendir á að sjúkdómurinn hafi einnig greinst í öðrum löndum flóttafólks sem kemur til Danmerkur. Hann vill að gerðar verði rannsóknir á klóakvatni, en með því er hægt að sjá tíðni sjúkdómsins og er sú aðferð notuð í nokkrum löndum, m.a. í Finnlandi. Astrid Krag, heilbrigðisráðherra Danmerkur, segist vera meðvituð um þá þróun sem hefur átt sér stað varðandi bólusetningar og segir að verið sé að meta hvort rannsaka eigi klóakvatn.