Versta flugslys í Finnlandi í mörg ár

Átta létu lífið í flugslysi í nágrenni við Jämijärvi-flugvöllinn í suðvesturhluta Finnlands rétt fyrir klukkan þrjú að staðartíma í dag. Þetta staðfesti lögreglan á blaðamannafundi nú í kvöld. Finnskir fjölmiðlar segja að flugslysið sé eitt það versta þar í landi í fleiri ár.

Enn er þó ekki vitað hver tildrög slyssins voru. Ljóst er hins vegar að ellefu manns voru um borð í vélinni, tíu fallhlífastökkvarar og einn flugmaður. Þrír björguðust, þar á meðal flugmaðurinn, en þeim tókst að stökkva út í tæka tíð með fallhlífarnar sínar.

Flugvöllurinn er um tvö hundruð kílómetra norður af Helsinki, höfuðborg Finnlands, en þar má finna eina helstu miðstöð fallhlífastökkvara í landinu, að því er segir í frétt á vef finnska ríkisútvarpsins Yle.

• Blogga um frétt