Abdoulaye Wade, fyrrverandi forseti Senegals, snýr aftur til heimalands síns á miðvikudaginn eftir að hafa dvalið í Frakklandi í tvö ár. Hann flúði Senegal og settist að í frönskum bæ eftir að hafa tapað forsetakosningunum árið 2012.
Wade var forseti Senegals á árunum 2000 til 2012 en laut í lægra haldi fyrir Macky Sall, núverandi forseta landsins, í kosningunum í marsmánuði árið 2012.
Sonur hans Karim Wade hefur orðið uppvís að spillingu en réttarhöld munu hefjast yfir honum í næsta mánuði. Talið er faðir hans vilji sýna honum stuðning í verki og þess vegna hafi hann ákveðið að flytja aftur til Dakars, höfuðborgar Senegals.
Abdoulaye segir að rannsókn lögreglunnar á Karim sé af pólitískum rótum runnin. „Ef sonur minn Karim endar í fangelsi, þá er það vegna þess að Macky Sall leit á hann sem eina andstæðinginn sem gæti sigrað hann,“ sagði Abdoulaye í samtali við franska dagblaðið Le Monde fyrr í vikunni.
Líklegt þykir að Karim bjóði sig fram gegn Sall í forsetakosningunum árið 2017, að því er segir í frétt AFP.