Margir Íslendingar hlupu í Boston

Margir Íslendingar hlupu í Boston-maraþoninu sem haldið var í dag, en þess var einnig minnst að eitt ár er síðan sprengjuárás var gerð við hlaupstaðinn þar sem þrír létust og 260 manns særðust. Í heild hófu 33 Íslendingarnir hlaupið, en auk þess tveir erlendir einstaklingar sem búsettir eru á Íslandi.

Fyrstur Íslendinga í mark var Þórir Magnússon á tveimur klukkustundum og 56 mínútum og var hann í sæti 1.698 af þeim rúmlega 36 þúsund sem tóku þátt. María Mjöll Jónsdóttir var fyrst íslenskra kvenna í mark, en hún hljóp á þremur klukkustundum, 29 mínútum og 51 sekúndu. Var hún í 2.074 sæti í kvennaflokki.

Lyuba Kharitonova kom þar á eftir, en hún hljóp á þremur klukkustundum og 32 mínútum.

Vegna sprengjuárásirnar í fyrra var mikil öryggisgæsla á staðnum og þurftu allir hlauparar að vera með búnað sinn í glærum pokum. Þá var áhorfendum bannað að vera með bakpoka og til að komast inn á viss svæði þurfti að fara í gegnumlýsingu.

Þegar þetta er skrifað hafa 12 íslenskir hlauparar lokið keppni, en rúmlega tuttugu eiga enn eftir að koma í mark.