Sameinuðu þjóðirnar hafa gripið til refsiaðgerða gegn íslömsku öfgasamtökunum Boko Haram. Samþykkt var í dag að setja samtökin á svartan lista yfir erlend hryðuverkasamtök, að því er segir í frétt AFP.
Aðgerðirnar felast meðal annars í sér bann við vopnasölu og eignafrystingu. Hins vegar er óljóst hvaða áhrif þær muni hafa, að sögn stjórnmálaskýrenda.
Bandaríkjamenn fögnuðu ákvörðuninni en þónokkuð er síðan stjórnvöld þar í landi settu Boko Haram á svarta listann.
Boko Haram samtökin voru stofnuð í Nígeríu árið 2002 og er markmið þeirra að berjast gegn vestrænum áhrifum og menntun í landinu. Þau hafa verið að færa sig upp á skaptið síðustu misseri, meðal annars með mannskæðum sprengjuárásum, en kornið sem fyllti mælinn var ránið á 223 skólastúlkum sem enn er haldið í gíslingu.
Þúsundir manna hafa látið lífið í árásum þeirra frá árinu 2009.