„Þegar ísraelsk stjórnvöld höfðu samþykkt vopnahléið sem hefði stöðvað átta daga átök hafnaði Hamas því án þess að hugsa sig um. Það sýnir að Hamas hefur engan áhuga á friði.“ Þetta kemur fram í yfirlýsingu sem John Baird, utanríkisráðherra Kanada, sendi frá sér í dag vegna átakanna fyrir botni Miðjarðarhafsins á milli Ísraels og Hamas-samtakanna. Vísaði hann þar til tillögu að vopnahléi sem stjórnvöld í Egyptalandi lögðu fram.
Baird sagði kanadísk stjórnvöld lengi hafa verið þeirrar skoðunar að saklausir íbúar Gaza-strandarinnar ættu betra skilið en ábyrgðarlausa framgöngu Hamas en samtökin fara með stjórn svæðisins. Áréttaði hann að Kanada liti á Hamas sem alþjóðleg hryðjuverkasamtök sem hefðu eyðingu Ísraelsríkis að markmiði. Þá sagði hann að allt friðelskandi fólk í heiminum yrði að hafna hryðjuverkum eins og árásunum sem gerðar hefðu verið á Ísrael undanfarna daga.
„Við teljum að Ísrael hafi rétt á því að verja sig sjálft gegn áframhaldandi hryðjuverkaárásum af hálfu Hamas. Við erum þakklát Egyptalandi fyrir tilraunir þess til þess að koma á vopnahléi.“
Frétt mbl.is: Ekkert varð úr vopnahléi