Bandaríska dagblaðið Wall Street Journal hefur útbúið gagnvirka teikningu, sem útlistar alla þá sem ferðuðust um borð í flugi MH17 sem var skotin niður á fimmtudaginn. Talið er að vélin hafi verið skotin niður af úkraínskum aðskilnaðarsinnum, hliðhollum Rússum.
Á teikningunni má sjá hvar fólk sat í vélinni og með hverjum það ferðaðist. Þannig sést að þeir sem sátu í sætum 4D, F, G, og sætum 5D og G ferðuðust saman.
Enn er verið að rannsaka hvað grandaði vélinni. Flugritar vélarinnar eru komnir í hendur malasískra stjórnvalda, sem annast rannsóknina.