Mark Rutte, forsætisráðherra Hollands, segir það óraunhæft að senda vopnaðar, alþjóðlegar hersveitir til að tryggja vettvanginn við brak malasísku farþegavélarinnar MH17 sem skotin var niður í Austur-Úkraínu. Hann segir að átök á svæðinu á milli aðskilnaðarsinna og úkraínskra hermanna spilli friði á svæðinu og komi í veg fyrir að hægt sé að nálgast braksvæði vélarinnar.
Á meðan slíkt ástand ríki sé óraunhæft að senda alþjóðlegt herlið á vettvang. Rutte segir hins vegar að hollensk stjórnvöld skoði nú alla möguleika til að tryggja vettvanginn.
Greint var frá því fyrr í dag að hollenskir sérfræðingar hefðu hætt við frekari rannsókn á braksvæði vélar MH17. „Á meðan átökin geisa getum við ekki tekið þessa áhættu. Öryggisráðstafanir á svæðinu eru algjörlega óviðunandi,“ sagði Alexander Hug hjá Öryggis- og samvinnustofnun Evrópu.
Allir 298 farþegar malasísku flugvélarinnar féllu þegar hún var skotin niður þann 17. júlí síðastliðinn. Mikill meirihluti farþega var af hollenskum uppruna. Talið er að aðskilnaðarsinnar í austurhluta Úkraínu, sem eru hliðhollir rússneskum stjórnvöldum, hafi skotið vélina niður.