Yfirvöld í Indlandi hafa brugðist við óvenjulegum vanda á óvenjulegan hátt, en apakettir þykja mikil plága í miðborg höfuðborgarinnar Nýju Delí. Þeir þykja sérstaklega kræfir við þinghúsið og aðrar opinberar byggingar þar sem þeir ganga berserksgang, róta í rusli og ráðast jafnvel á fólk í leit að mat.
Indverjar deyja þó ekki ráðalausir, en nú hafa fjórir tugir sérþjálfaðra manna verið ráðnir til að dreifa sér um svæðið með apagrímur og láta öllum illum látum í því skyni að fæla apana burt. Fulltrúi félagsmálayfirvalda í Delí ítrekaði að mennirnir væru vel þjálfaðir og „mjög hæfileikaríkir“ í störfum sínum.
„Þeir ganga gjarnan með grímur, fela sig bak við tré og gefa frá sér hávær hljóð til að hræða apana í burtu,“ sagði fulltrúinn í samtali við AFP fréttaveituna.
Indverskir fjölmiðlar hafa slegið á létta strengi í tengslum við málið og velt vöngum yfir því hvers vegna halda þurfi öpum frá þinghúsinu, þegar þingmennirnir hagi sér sjálfir eins og apakettir.