Meriam Yahia Ibrahim Ishag, súdanska konan sem dæmd var til dauða fyrir trúvillu fyrr á þessu ári, er nú komin til Bandaríkjanna. Hún kom með flugi til Philadelphiu í gærkvöldi ásamt eiginmanni sínum, sem er bandaríkur ríkisborgari og tveimur börnum þeirra. Hjónin fóru því næst til New Hampshire, þar sem fjölskylda eiginmanns Ishag býr, og var þeim tekið fagnandi.
Eftir að Ishag var sleppt úr haldi fyrr í sumar ætlaði hún til Bandaríkjanna ásamt fjölskyldu sinni. Hún var handtekin á flugvellinum en þegar henni var sleppt, leituðu þau skjóls í sendiráði Bandaríkjanna í Súdan þar sem henni höfðu borist líflátshótanir. Eftir mánaðarlanga dvöl í sendiráðinu fór fjölskyldan til Ítalíu.
Meriam Yahia Ibrahim Ishag á föðir sem er múslími og samkvæmt súdanskri túlkun á lögum íslam, sem tóku gildi í landinu 1983, er henni þar með óheimilt að hverfa frá trúnni. Hún á hinsvegar kristna móður og segist ekki hafa verið alin upp sem múslími og aldrei litið á sig sem slíkan.
Eiginmaður hennar og barnsfaðir er frá Suður-Súdan en með bandarískan ríkisborgararétt. Yngsta barn þeirra, Maya, kom í heiminn í maí, en Ibrahim fæddi hana í fangelsi stuttu eftir að hún var dæmd til hýðingar og hengingar fyrir að kasta trúnni. Dómurinn vakti harða fordæmingu um allan heim og var að lokum afturkallaður.
Flúin til Ítalíu eftir guðlastsdóminn