Danskur barnaníðingur ákærður

Rúmlega fertugur danskur barnaníðingur lét sig dreyma um að halda barnungum stúlkum sem kynlífsþrælum í bílskúr sem hann leigði í Óðinsvéum.

Maðurinn, Claus Jensen, er ákærður fyrir að hafa beitt tvær stúlkur, 10 og 11 ára, kynferðislegu ofbeldi haustið 2012. Hann tók ofbeldið upp á myndskeið sem hann dreifði á netinu. Jensen var handtekinn í fyrra og hefur setið í gæsluvarðhaldi síðan 1. júlí í fyrra. Hann er ákærður fyrir fjölda afbrota samkvæmt frétt Ekstrabladet í dag. 

Lenette Skak, hjá lögreglunni á Fjóni, segir í viðtali við Ekstra Bladet að Jensen, sem þá gekk undir nafninu Nis Benner-Hansen, hafi leigt bílskúr í miðborg Óðinsvéa. Hann hafði einnig útvegað sér handjárn, reipi, leðurólar og ýmislegt fleira sem hann ætlaði að nota þegar hann hefði rænt stúlku sem hann ætlaði að gera að kynlífsþræl sínum.

Jensen er einnig ákærður fyrir að hafa reynt að nauðga konu að næturlagi í Óðinsvéum 20. október 2012. Sú tilraun hans mistókst en sex dögum síðar réðst hann á ellefu ára gamla stúlku sem hann beitti kynferðislegu ofbeldi. 14. nóvember 2012 réðst hann á tíu ára gamla stúlku og beitti ofbeldi.

Réttarhöld í málinu hefjast í nóvember, samkvæmt frétt Ekstrabladet, en Jensen hefur verið úrskurðaður sakhæfur.

• Blogga um frétt