Breski hjálparstarfsmaðurinn David Haines var fyrrverandi hermaður sem hafði eytt síðastliðnum árum í hjálparstarfi á stríðshrjáðum svæðum. Hann er nýjasta og þriðja opinbera fórnarlamb samtakanna sem kenna sig við Ríki Íslams en í gær birtu þau myndband af aftöku hans.
Haines var fjörtíu og fjögurra ára tveggja barna faðir og lýsir bróðir hans honum sem venjulegum lífsglöðum manni sem leið best í erfiðum kringumstæðum. Haines var meðlimur í konunglega flughernum og vann síðar með hjálparsamtökum á Balkanskaga, í Líbýu, S-Súdan og Sýrlandi. Hann starfaði á vegum frönsku samtakanna NGO þegar honum var rænt í mars 2013 ásamt samstarfsmanni sínum Federico Motka. Motka var látinn laus í maí sl. en ekkert fréttist hins vegar af Haines fyrr en honum var hótað í myndbandi sem samtökin létu frá sér fyrr í mánuðinum þar sem bandaríski blaðamaðurinn Steven Sotloff var afhöfðaður.
Bróðir hans segir Haines hafa verið myrtan með köldu blóði. Hann sagði að hans yrði sárlega saknað og minntist góðra stunda í æsku með bróður sínum þegar þeir voru í tjaldútilegu og á ferðalögum. „Hann var góður bróður. Til staðar þegar ég þurfti á honum að halda. Ég vona að honum hafi fundist það sama um mig,“ sagði hann. Í réttu skapi gat hann miðpunktur athyglinnar og líf og fjör í kringum hann en á öðrum stundum algjör kvöl og pína að umgangast. „Hann myndi örugglega segja það sama um mig,“ sagði hann.
„Hann hjálpaði hverjum þeim sem þurfti á hjálp að halda og leit algjörlega framhjá kynþætti og trúarbrögðum,“ sagði bróðir hans.
Frétt mbl.is: Ekki múslímar heldur skrímsli
Frétt mbl.is: Ætla að ganga frá ríki íslams