Sjö fangar í hungurverkfalli

Sjö menn frá Sahrawi, sem voru harkalega barðir í marokkósku fangelsi í Vestur-Sahara hafa nú farið í hungurverkfall. Amnesty International staðfesti þetta í dag.

Að sögn Amnesty voru mennirnir voru handjárnaðir og harkalega barðir á miðvikudaginn fyrir framan aðra fanga í garði fangelsisins í Laayoune.  Mennirnir sjö voru handteknir snemma á þessu ári við mótmæli í Laayoune.

Eftir barsmíðarnar á miðvikudaginn voru þeir mikið slasaðir og m.a. er einn þeirra handleggsbrotinn. 

Lögreglustjórinn á svæðinu neitaði ásökunum Amnesty International í samtali við AFP.

„Þeir neituðu að fylgja reglum fangelsisins. Þeir notuðu glerbrot til þess að ráðast á fjóra fangaverði sem slösuðust í kjölfarið,“ sagði lögreglustjórinn og bætti við að hann ætti myndband af árásum fanganna. 

Fangelsisstjórinn hefur jafnframt neitað því að mennirnir séu í hungurverkfalli. 

Amnesty International hefur í dag þrýst á yfirvöld í Marokkó að sjá til þess að mennirnir verði ekki pyntaðir, heldur fái þá hjálp sem þeir þurfi vegna áverka sinna. 

Samtökin kröfðust einnig þess að málið verði rannsakað. 

• Blogga um frétt