Að minnsta kosti þrír hafa látist vegna fellibyljarins Odile í Mexíkó. Tala látinna fór úr tveimur í þrjá þegar að suður-kóreskur maður fannst látinn við höfnina í Los Cabos í dag.
Samkvæmt upplýsingum frá yfirvöldum eru tveir breskir ríkisborgarar týndir eftir fellibylinn en hann fór yfir svæðið á mánudaginn og olli gífurlegu tjóni á hótelum og íbúðarhverfum.
Maðurinn sem fannst látinn í dag var 58 ára gamall. Degi áður hafði samstarfsmaður hans fundist látinn eftir að hafa drukknað.
Mennirnir tveir voru að reyna að keyra bíl í gegnum vatnsstraum en straumurinn sópaði þeim í burtu og mennirnir létust í kjölfarið.
Þyrlur hafa verið notaðar við leit af skosku pari, en bátur þeirra sökk þegar að Odile fór yfir.
„Við vitum að tveir breskir ríkisborgarar eru týndir í Mexíkó,“ sagði í yfirlýsingu breska utanríkisráðuneytisins í dag.
„Við höfum verið í sambandi við yfirvöld á svæðinu og boðið fjölskyldum fólksins aðstoð á þessum erfiðu tímum.“