Erlent | mbl | 10.10.2014 | 9:47

„Ég er með ebólu“

Frá trúarhátíð í Dóminikanska lýðveldinu. Frí mannsins, sem í gríni sagðist vera með ebólu, varð styttra, en fyrirhugað var. ERIKA SANTELICES

„Ég er með ebólu, það er úti um ykkur öll,“ á farþegi að hafa hrópað um borð í farþegaþotu frá US Airways á leið frá Fíladelfíu í Bandaríkjunum til Punta Cana í Dóminíkanska lýðveldinu á miðvikudag. Í ljós kom að maðurinn var að reyna að vera fyndinn, en „brandarinn“ vakti ekki mikla kátínu um borð í vélinni.

Þegar vélin lenti komu heilbrigðisstarfsmenn í bláum hlífðarfötum um borð í vélina og tóku hann á brott.

„Ég var bara að grínast, ég er ekki frá Afríku,“ á maðurinn að hafa hrópað. Hann var á leið í tveggja vikna leyfi, en sú fyrirætlan rann út í sandinn og var hann sendur heim daginn eftir uppákomuna. Læknisskoðun sýndi að hann væri ekki smitaður.

200 farþegar voru um borð í vélinni og ríkti bæði reiði og ótti meðal þeirra. Einn farþeganna myndaði þegar sóttvarnarsérfræðingarnir á flugvellinum komu um borð. Áður hafði flugfreyja reynt að róa farþegana. „Ég vil biðja alla að fá sér sæti. Þetta mun virðast verra en það er.“ Hún sagðist hafa verið flugfreyja í 36 ár og bætti við: „Ég held að maðurinn sem sagði þetta sé fáviti.“