Leikarinn Steve Coogan hefur verið fenginn til að taka við hlutverki Philips Seymours Hoffmans í sjónvarpsseríunni Happyish, eins og fram kemur á vef BBC. Tökur þáttanna áttu að hefjast um svipað leyti og Hoffman lést af of stórum skammti eiturlyfja í febrúar.
Búið var að taka upp prufuþátt þar sem Hoffman lék á móti leikaranum Rys Ifans og grínistanum Louis CK en ljóst er að taka þarf upp nýjan prufuþátt þar sem Coogan kemur inn í stað Hoffmans. Enn er óvíst hvort meðleikarar Coogans munu endurtaka leik sinn í nýrri útgáfu prufuþáttarins.
Höfundur þáttanna, Shalom Auslander, segir Coogan búa yfir einstökum hæfileikum sem passi vel fyrir hlutverk hans í þáttunum en þar leikur hann Thom Payne sem er Breti en býr í New York. Líf hans raskast svo verulega þegar hann fær nýjan yfirmann sem er mun yngri en hann.
Þegar Hoffman lést minntist Coogan hans opinberlega og sagði: „Hann var gríðarlega hæfileikaríkur leikari sem ég leit mjög upp til. Hann var fyrirmynd okkar hinna og var sannur listamaður,“ og bætti svo við að hann yrði í hávegum hafður hjá leikurum um ókomna tíð.