Mercy Paul er átján ára gömul nígerísk stúlka sem hóf nýlega nám við heimavistarskóla í Canyonville í Oregon ríki í Bandaríkjunum. Fyrir aðeins sjö mánuðum síðan var henni, ásamt 275 öðrum stúlkum, rænt af meðlimum hryðjuverkasamtakanna Boko Haram.
„Það var engin leið fyrir okkur að komast í burtu,“ segir Mercy í sjónvarpsviðtali við bandarísku sjónvarpsstöðina NBC. „Þeir sögðu að þeir myndu drepa okkur.“
Draumur Mercy er að verða læknir. Nú er hún þó á fullu að læra nýtt tungumál, ensku og inn á nýja menningu sem inniheldur körfubolta, þythokkí og tölvuleiki.
Kristin góðgerðarsamtök, The Jubilee Campaign, vinna nú að því að safna fjármagni til þess að fá 57 stúlkur frá Nígeríu, sem sluppu frá Boko Haram til þess að koma til Bandaríkjanna til þess að klára menntaskola.
„Í biblíunni segir Guð að hann geti talað við fólk, jafnvel í draumum þeirra,“ segir hún. „Ég bið þess að þeir finni að Guð fyrirgefi og sýnir miskunn og þeir geti hætt að gera það sem þeir gera.“