Kúba hefur sleppt Bandaríkjamanninum Alan Gross úr haldi. Gross er verktaki og hefur verið í fangelsi á Kúbu frá árinu 2009. Er honum sleppt vegna mannúðarsjónarmiða að beiðni bandarískra stjórnvalda. Hann var handtekinn fyrir að dreifa fjarskiptabúnaði meðal gyðinga á eyjunni er hann vann þar sem verktaki. Hann var dæmdur í 15 ára fangelsi árið 2011.
Bandaríska sjónvarpsstöðin ABC greindi fyrst frá málinu og kemur fram í frétt hennar að Gross, sem er 65 ára gamall, sé þegar á heimleið.
Barack Obama Bandaríkjaforseti og Raul Castro forseti Kúbu munu báðir flytja ávörp kl. 17 að íslenskum tíma.