Api veitir fyrstu hjálp (myndskeið)

Api á Indlandi gerir sterkt tilkall til nafnbótarinnar Krútt jólahátíðarinnar 2014 eftir að hann kom vini sínum til bjargar á járnbrautarteinum í borginni Kanpur. Annar api var þar með slappasta móti en vinurinn veitti einhvers konar apaútgáfu af fyrstu hjálp og bar hún tilætlaðan árangur. 

Atvikið átti sér stað við lestarstöð í borginni og fjöldi fólks varð þar af leiðandi vitni að björguninni. Tóku nærstaddir ljósmyndir og hreyfimyndir af atvikinu á snjallsíma sína. Meðfylgjandi myndskeið komst í heimspressuna og var til að mynda birt af AP-fréttastofunni. 

Apinn sem slasaðist mun hafa fengið raflost og misst meðvitund um tíma. Aðferðirnar sem vinurinn beitti við að koma honum aftur á fætur voru ekki í líkingu við þær sem Magnús Hansson kenndi á námskeiðum Slysavarnarfélagsins heldur virðist apinn bíta hinn slasaða í hálsinn auk þess að hrista hann. Aðferðirnar skiluðu árangri og er það fyrir öllu. 

• Blogga um frétt