Bandalag gegn hryðjuverkum

Bresk og bandarísk stjórnvöld hafa ákveðið að taka höndum saman í baráttunni gegn öfgastefnu og hryðjuverkahópum. Sérstakur aðgerðarhópur verður settur á laggirnar og munu ríkin deila sérfræðiþekkingu sinni.

David Cameron, forsætisráðherra Bretlands, greindi frá þessu í dag eftir að hafa átt fund með Barack Obama, forseta Bandaríkjanna í Hvíta húsinu í Washington. Hann sagði að Bandaríkin og Bretland glímdu við eitraða hugmyndafræði ofstækisfullra hópa. 

Sérstakur aðgerðahópur verður settur á laggirnar og skal hann skila Cameron og Obama sérstakri skýrslu um málið innan hálfs árs. Greint er frá þessu á vef BBC.

Þá greindi breski forsætisráðherrann frá því, að bresk stjórnvöld muni senda fleiri ómönnuð loftför, svokallaða dróna, sem munu aðstoða hersveitir sem berjast við liðsmenn hryðjuverkasamtakanna Ríki íslam á jörðu niðri. 

Obama sagði að unnið væri hörðum höndum að því að koma í veg fyrir árásir hryðjuverkahópa og sigrast á þeim.

Cameron var spurður hvort árás á Bretland væri yfirvofandi. Hann sagði að viðbúnaðarstigið í Bretlandi væri alvarlegt, sem þýddi að miklar líkur væru á árás. 

Cameron segir að líkur á að árás verði gerð í Bretlandi séu miklar. EPA

Obama segir að unnið sé hörðum höndum að því að koma í veg fyrir árásir og uppræta hryðjuverkahópa. EPA

• 1 blogg um fréttina

Bloggað um fréttina

• Axel Jóhann Hallgrímsson: Fláráður og vinur hans Flækjufótur