Forsetinn leggur niður leyniþjónustuna

Forseti Argentínu, Cristina Fernandez de Kirchner, mun leggja niður leyniþjónustu landsins. Þetta tilkynnti forsetinn í ávarpi í gærkvöldi. Sagðist hún ætla að leggja fram lagafrumvarp til stofnunar nýrrar leyniþjónustu. BBC segir frá þessu.

Í ávarpinu sagði Fernandez að leyniþjónustan hafi lítið breyst síðan herstjórn ríkti í landinu til ársins 1983. Breytingin kemur í kjölfar undarlegs andláts saksóknarans Albertos Nisman, sem fannst látinn aðeins nokkrum klukkustundum áður en hann átti að bera vitni gegn yfirmönnum í ríkisstjórninni. 

Hafði Nisman verið að rannsaka sprengjuárás í miðstöð gyðinga í Buenos Aires árið 1994 þar sem 85 létu lífið. Hafði hann ásakað fjölmarga yfirmenn í ríkisstjórninni, m.a. forsetann og utanríkisráðherrann Hector Timerman, um að fela meint tengsl stjórnvalda í Íran við sprenginguna. 

Nisman fannst látinn í íbúð sinni 18. janúar síðastliðinn. Í fyrstu var talið að hann hafi framið sjálfsmorð en byssa fannst á vettvangi. Rannsóknarmenn hafa þó sagt nú að ekkert sé útilokað. 

Forsetinn segist sannfærð um að Nisman hafi verið myrtur.

Dauði Nismans hefur vakið mikla athygli. AFP

• Blogga um frétt