Maðurinn sem grunaður er um að hafa borið ábyrgð á tveimur skotárásum í Kaupmannahöfn í gær var 22 ára og fæddur og uppalinn í Danmörku. Maðurinn hét Omar Abdel Hamid El-Hussein, en eins og komið hefur fram var hann skotinn til bana af lögreglu eftir árásirnar í gær. 

Lögregla þekkti til mannsins vegna ofbeldishneigðar hans og tengingu hans við glæpagengi samkvæmt frétt TV2 í Danmörku. Samkvæmt frétt Ekstra-Bladet losnaði maðurinn úr fangelsi aðeins tveimur vikum fyrir árásina, en hann hafði setið inni fyrir líkamsárás.

Tveir lét­ust í árás­un­um og seg­ir danska lögreglan að árásarmaðurinn hafi mögu­lega verið und­ir áhrif­um frá hryðju­verk­un­um sem voru fram­in í Par­ís. Örygg­is­lög­regla lands­ins þekkti til manns­ins sem er tal­inn hafa verið einn á ferð. 

Mikil sorg ríkir í Danmörku eftir árásirnar, sem voru annars vegar gerðar á menningarhús í Kaupmannahöfn og hins vegar á bænahús gyðinga í borginni. Í árásinni á menningarhúsið lést danski kvik­mynda­gerðarmaður­inn Finn Nørga­ard, 55 ára, en talið er að skot­markið hafi verið sænski teikn­ar­inn Lars Vilks sem teiknaði á sín­um tíma skop­mynd­ir af Múhameð spá­manni. Í menn­ing­ar­hús­inu fór í dag fram ráðstefna um list, tján­ing­ar­frelsi og guðlast.

Í árásinni á bænahúsið lést Dan Uzan, 37 ára gamall gyðingur. Uzan var vel liðinn og þekkt­ur í sam­fé­lagi gyðinga í Kaup­manna­höfn. Hann var á vakt í bæna­hús­inu í gær­kvöldi en þar var verið að ferma (bar mitzva) unga stúlku. „Manni líður minna öruggum, sérstaklega í gyðingasamfélaginu,“ sagði 65 ára gamli Liebecke í samtali við AFP fréttastofuna.

„Þetta er hræðilegt. Þetta er árás á hina frjálsu veröld,“ sagði hinn 84 ára gamli Joergen Johanssen annar viðmælandi fréttastofunnar.

Mikill viðbúnaður ríkir hjá dönsku lögreglunni eftir árásirnar.