Nauðgaði syni sínum á fyrsta ári

Réttarhald í einu óhugnanlegasta barnaníðsmáli sem hefur komið til kasta yfirvalda í Noregi stendur nú yfir í Noregi. Rúmlega þrítugur maður hefur játað að hafa nauðgað tveggja mánaða gömlum syni sínum og komið myndskeiði af ofbeldinu í dreifingu meðal annarra barnaníðinga á netinu.

Lögmaður mannsins, sem er 32 ára að aldri,  sagði umbjóðanda sinn játa sök í öllum ákæruliðum. Við réttarhöldin í Drammen í morgun sagðist maðurinn vera afar óstyrkur og þykja óþægilegt að tala um þetta en hann vissi að hann neyddist til þess. Maðurinn er einnig sakaður um að hafa nauðgað fleiri börnum og tekið þátt í fleiri ódæðisverkum gagnvart börnum.

Samkvæmt Aftenposten eyddi maðurinn talsverðum tíma í að greina frá erfiðri æsku sinni, hann hefði verið fórnarlamb eineltis í æsku og síðar spilafíkill. Þegar hann losnaði við þá fíkn tók klámfíknin við. Hann sagðist hafa talið að þar sem börnin væru svo lítil hefði þetta ekki haft nein áhrif á þau. Hann gerði sér nú grein fyrir að það væri ekki rétt. 

Maðurinn bjó um tíma með konu á þrítugsaldri sem einnig er ákærð í málinu en hún, maðurinn og fleiri beittu dóttur hennar og fleiri börn kynferðislegu ofbeldi.

Lögreglan hóf rannsókn á barnaníðshringnum í fyrra eftir að myndskeið sem sýndi nauðgun á barni fannst í tölvu barnaníðings ásamt fleiri myndskeiðum af svipuðum toga.

Saksóknari í Drammen, Kristin Røhne, sagði við réttarhöldin að þau hefðu ekki vitað annað um barnið en að í bakgrunni mátti heyra hljóð frá norska útvarpinu eða sjónvarpinu. Myndskeiðið var rakið til 34 ára gamals manns, sem hlaut dóm fyrir barnaníð árið 2009 og dreifingu og vörslu barnaníðs. 

• 1 blogg um fréttina

Bloggað um fréttina

• Axel Jóhann Hallgrímsson: Skítlegt eðli