Yanis Varoufakis, fjármálaráðherra Grikklands, sagði í gær að gríska ríkisstjórnin þyrfti mögulega að bíða með að uppfylla nokkur kosningaloforð sín á meðan viðræður standa yfir við lánardrottna gríska ríkisins.
Á blaðamannafundi á Ítalíu í gær sagði fjármálaráðherrann jafnframt að samningaviðræðurnar gætu jafnvel staðið yfir í nokkur ár. Hann vildi annars ekki tjá sig frekar um hvaða kosningaloforð þyrfti að slá á frest.
Flokkur hans, vinstriflokkurinn Syriza, var sigurvegari þingkosninganna í Grikklandi sem fram fóru í lok janúarmánaðar. Flokkurinn lofaði því meðal annars fyrir kosningarnar að draga verulega úr aðhaldsaðgerðum og auka þess í stað útgjöld til ýmissa málaflokka.
Forseti framkvæmdastjórnar Evrópusambandsins, Jean-Claude Juncker, hefur sagst vera ósáttur við hversu hægt miðar í viðræðum Grikkja við lánardrottna sína. Hann segir hins vegar enga hættu á að viðræðurnar sigli í strand með þeim afleiðingum að Grikkir yfirgefi evrusvæðið.