Líkti Krímskaga við Falklandseyjar

Rússland á mun ríkari kröfu til Krímskagans en Bretland til Falklandseyjanna. Þetta sagði formaður utanríkismálanefndar rússneska þingsins, Alexei Pushkov, eftir að bresk yfirvöld ítrekuðu fordæmingu sína á ólöglegri innlimun Krímskagans.

„Athugið London: Krím hefur mun meiri ástæðu til að tilheyra Rússlandi en Falklandseyjar hafa til að tilheyra Bretlandi,“ segir Pushkov í færslu á Twitter. Var færslan svar við yfirlýsingu utanríkisráðherra Breta, Philips Hammonds, sem fyrr í dag fordæmdi „svívirðilegt brot Rússa á úkraínskum og alþjóðlegum lögum,“ eins og hann lýsti innlimun Krímskagans í Rússland.

„Innlimun Krím var ólögleg í mars árið 2014 og er ennþá ólögleg í mars 2015. Rússland verður að skila Krím til Úkraínu,“ segir í yfirlýsingu Hammonds.

Argentína gerir enn tilkall til Falklandseyjanna, sem eru 500 kílómetra frá ströndum landsins í Suður-Atlantshafi, en 14 þúsund kílómetra frá Bretlandi. Eyjarnar hafa verið undir stjórn breskra yfirvalda síðan árið 1833, þrátt fyrir innrás Argentínu í eyjarnar árið 1982. Úr varð stríð þar sem næstum þúsund manns féllu.

Íbúar eyjanna hafa ítrekað kosið með yfirgnæfandi meirihluta atkvæða að lúta áfram breskri stjórn.

• Blogga um frétt