Lögreglan í New York hefur fjarlægt styttu af bandaríska uppljóstraranum Edward Snowden, sem hópur listamanna kom fyrir í garði í Brooklyn í borginni í gær.
Hópurinn kom styttunni fyrir - án leyfis - um nóttina en lögreglan fjarlægði hana um miðjan dag.
Listamennirnir höfðu stillt styttunni upp á súlu í garðinum. Súlan er hluti af minnisvarða um 11.500 píslarvotta sem létu lífið um borð í breskum fangaskipum í frelsisstríði Bandaríkjanna árið 1776.
Listamennirnir sögðu það enga tilviljun að styttunni hafi verið komið fyrir þarna. Saga Snowdens minni á sögu píslarvottanna og eins væri málstaðurinn ekki ólíkur.