10 tonn af silfurpeningum af hafsbotni

Teymi breskra sérfræðinga hefur náð að koma tíu tonnum af silfurpeningum af hafsbotni. Peningarnir eru sagðir um 7 milljarða króna virði. Aldrei áður hefur verið kafað svo djúpt eftir fjársjóð á sjávarbotni. Peningarnir voru í flaki gufuskips sem sökk á leið sinni frá Bombay á Indlandi til Englands árið 1942.

Gufuskipið SS City of Cairo sökk um 772 km suður af eyjunni St. Helena í sunnanverðu Atlantshafi. Þýskur kafbátur sökkti skipinu. Sökk það niður á 5.150 m dýpi. Um borð voru 100 tonn af silfurpeningum sem tilheyrðu breska ríkinu. Verið var að flytja þá frá Indlandi til Bretlands til að nota þá til frekari stríðsrekstrar í síðari heimsstyrjöldinni, segir í frétt BBC.

En peningarnir skuluð sér aldrei alla leið. Þýskur kafbátur skaut tundurskeytum á gufuskipið þann 6. nóvember 1942. 

Það var ekki fyrr en árið 2011 að flak skipsins fannst eftir mikla leit teymis undir stjórn John Kingsford, sem sérhæfir sig í leit og björgun skipsflaka. Sérfræðingar, á verktakasamningi við breska ríki, leituðu um hafsbotninn við erfið skilyrði í nokkrar vikur. Leitarsvæðið var tvisvar sinnum stærra en London, að því er fram kemur í frétt BBC.

Um 10 tonnum af silfurpeningum var komið upp á yfirborðið. Þegar er búið að bræða þá í Bretlandi og selja. Ágoðinn fer annars vegar til breska ríkisins og hins vegar til björgunarteymisins. 

Aðgerðinni lauk í september árið 2013. Það er þó ekki fyrr en nú sem bresk stjórnvöld hafa gefið leyfi til að segja frá henni.

• Blogga um frétt