Grunaður um barnsrán og níð

Tæplega fimmtugur bóndi hefur verið handtekinn grunaður um að hafa rænt sjö ára gamalli franskri stúlku á fimmtudaginn í síðustu viku. Stúlkunni, Berenyss, var skilað aftur en að sögn saksóknara í Meurhe-et-Moselle er maðurinn grunaður um að hafa beitt hana kynferðislegu ofbeldi.

Samkvæmt frétt Le Parisien beindist grunur að manninum, sem er nefndur Eric F, en hann neitaði en lífsýni úr karlmanni fundust á fatnaði og nærfatnaði stúlkunnar. Allt bendir til þess að um lífsýni úr Eric F sé að ræða og var hann því handtekinn á heimili sínu í Montzéville snemma í morgun. Hann hefur fjórum sinnum verið dæmdur fyrir ofbeldisbrot. Hann hefur ekki verið dæmdur fyrir barnaníð en samkvæmt Le Monde var hann sakaður um barnaníð af hálfu nákomins ættingja nýverið. Maðurinn er fráskilinn og faðir nokkurra barna.

Svo virðist sem Berenyss hafi getað gefið greinargóða lýsingu á bíl mannsins og heimili hans. Að sögn saksóknara verður gefin út ákæra á hendur manninum fyrir barnsrán og barnaníð síðar í dag.

 Berenyss var numin á brott um miðjan dag á fimmtudag í þorpinu sem hún býr í. Hvít sendibifreið sást skömmu síðar á ferðinni þar. Átta klukkustundum eftir að hafa verið rænt var hún skilin eftir heil á húfi fyrir utan heimili læknis í þorpi í um 120 km frá heimabæ hennar.

Á föstudag sagði saksóknari að stúlkan þekkti ekki þann sem rændi henni og að rannsóknin beindist að þekktum barnaníðingi. 

Meðal helstu vísbendinga í málinu voru lífsýni sem fundust í sælgætispoka sem ræninginn hafði notað til þess að tæla stúlkuna í bíl sinn.

Frétt le Parisien