Jarðskjálftinn í Nepal hefur áhrif á daglegt líf átta milljón manna, þarf hrjáir matarskortur 1,4 milljónir íbúa landsins. Jafnframt er takmarkað aðgengi að vatni og neyðarskýlum. Vitað er að 4.310 létust í skjálftanum sem reið yfir á laugardag og mældist 7,8 stig. Þetta kemur fram í nýrri skýrslu frá Sameinuðu þjóðunum um ástandið í Nepal í kjölfar jarðskjálftans.

Neyðaraðstoð er byrjuð að berast en enn er skortur á lyfjum, mat og líkpokum. Í höfuðborginni, Katmandú, blasir eyðileggingin við þar sem fjölmargar byggingar, þar á meðal sögufrægar byggingar, eru rústir einar.

Tæplega átta þúsund manns slösuðust í jarðskjálftanum, segir talsmaður innanríkisráðuneytisins, Laxmi Prasad Dhakal.