Þrátt fyrir að vera aðeins tveggja daga gömul er ýmislegt á dagskránni. Til að mynda mun hún hitta Elísabetu Englandsdrottningu í dag en Elísabet er langamma hennar. 

Vilhjálmur Bretaprins og Katrín hertogaynja af Cambridge eignuðust stúlkubarn á laugardaginn en fyrir eiga þau prinsinn Georg, sem fæddist fyrir tæpum tveimur árum. Samkvæmt Telegraph í dag hefur litla prinsessan dvalið í Kensingtonhöll undanfarnar tvær nætur en það er heimili fjölskyldunnar í Lundúnum. 

Í dag leggur hún í ferðalag með foreldrum og stóra bróður á sveitasetur fjölskyldunnar, Anmer Hall, en þar í næsta nágrenni er langamman, sem er samkvæmt Telegraph mjög spennt að hitta nýjasta afkomandann.

Anmer Hall er í Sandringham þar sem Elísabet Englandsdrottning dvelur um þessar mundir, en Vilhjálmur, Katrín og börn þeirra munu dvelja þar út mánuðinn. Vilhjálmur er í fæðingarorlofi til 1. júní.