Framkvæmdastjóri kvikmyndahátíðarinnar í Cannes hefur beðist afsökunar á því að konum á hátíðinni hafi verið vísað af rauða dreglinum fyrir að vera ekki í háhæluðum skóm. „Við biðjumst afsökunar,“ sagði Thierry Fremaux. „Það var kannski full mikill ákafi í öryggisvörðunum.“
Kvikmyndahátíðin hefur verið harðlega gagnrýnd síðustu daga, en fjöldi kvenna hefur verið vísað af rauða dreglinum fyrir að vera í flatbotna skóm. Þar á meðal er danski kvikmyndaframleiðandinn Valeria Richter, sem missti hluta af öðrum fæti sínum og getur því ekki gengið í háum hælum.
Breska leikkonan Emily Blunt tjáði sig um málið á blaðamannafundi í gær og sagði það mikil vonbrigði að svona væri komið fram við konur. „Þegar maður heldur að fólk sé orðið meðvitaðra um jafnrétti og hafi áttað sig á því að konur geta náð jafn miklum árangri og verið jafn athyglisverðar.“
Þá sagði hún alla ættu að vera í flatbotna skóm að sínu mati. „Það er bara mín skoðun, mér finnst betra að vera í converse strigaskóm,“ sagði hún hlæjandi.
Richter sagði í samtali við BBC að hún gæti ekki haldið jafnvægi á háum hælum eftir að hluti vinstri fótar hennar var fjarlægður. Hún var fjórum sinnum stoppuð þegar hún var á leið á frumsýningu á laugardag.
„Þeir bentu á skóna mína og veifuðu svo fingrunum að mér. Það var mjög augljóst að það væru skórnir mínir sem voru vandamál,“ sagði hún. „Augljóslega gat ég veifað fætinum mínum að þeim, og það gerði aðstæðurnar frekar vandræðalegar fyrir þá, því ég hafði sýnilega skýringu á því að vera ekki í hælum.“
Richter var á endanum hleypt inn, en hún segir marga samstarfsfélaga sína sem ekki geta gengið á hælum hafa verið neitað og ekki komist inn.
Þá átti annað atvik sér stað við frumsýningu nýjustu kvikmyndar Cate Blanchett, Carol, og hafði BBC eftir Screen Daily að talsmenn hátíðarinnar hafi staðfest að skylda hafi verið að vera í háhæluðum skóm á rauðum dreglum hennar.
Eftir það sagði framkvæmdastjórinn að um orðróm hafi verið að ræða sem eigi sér enga stoð í raunveruleikanum og að ekki sé talað sérstaklega um hæla í kröfum sem hátíðin gerir um klæðaburð. Hann virðist þó hafa breytt um afstöðu nú.