Drap kanínu í beinni með reiðhjólapumpu

„Við drápum hann til að fá viðbrögð og umræður um dýravelferð,“ segir danski útvarpsmaðurinn Asger Juhl sem drap kanínu í beinni útsendingu með reiðhjólapumpu.

Juhl starfar á útvarpsstöðinni Radio24syv. Atvikið átti sér stað að morgni annars í hvítasunnu í þættinum Morgen! Þáttastjórnendurnir tveir, Kristoffer Eriksen og Asger Juhl, aflífuðu kanínuna Allan í hljóðverinu til að vekja athygli á „hræsni“ Dana er kemur að dýravelferð. Segja þulirnir að flestir borði kjöt en vilji ekkert af drápinu sem kjötneyslu fylgir vita. Útvarpsmennirnir tóku fram að þeir ætluðu að snæða kanínuna í gærkvöldi. „Við borðum kjöt á hverju kvöldi heima hjá mér, dýr drepst svo að við verðum mett,“ sagði Juhl.

Og vissulega skapaðist umræða um dýravelferð við þennan gjörning útvarpsmannanna. Á samfélagsmiðlum eru þeir harðlega gagnrýndir fyrir uppátækið. 

Eriksen og Juhl hafa m.a. sagt að þeir hafi hringt í dýrahirði í dýragarðinum í Álaborg og fengið ráðleggingar. Þeir segja hann drepa margar kanínur í viku hverri en þær eru notaðar í fóður handa öðrum dýrum garðsins. „Hann sagði okkur hvernig ætti að gera þetta.“

Kanínan Allan fékk banahöggið með reiðhjólapumpu úr járni. Uppnám varð í hljóðverinu í kjölfarið. Linse Kessler, sem var gestur í þættinum og þangað komin til að ræða dýravelferð, kom inn í hljóðverið til að reyna að bjarga kanínunni. Þá flúði Juhl og hljóp hringinn í kringum borðið með Allan í höndunum.

Hér að neðan má heyra brot úr þættinum þegar kanínan er drepin.

• Blogga um frétt