Dennis Hastert, fyrrum forseti fulltrúadeildar bandaríska þingsins, verður leiddur fyrir dómara í Chicago á fimmtudagsmorgun, en hann hefur verið ákærður fyrir að brjóta bankalög og ljúga að lögreglumönnum.
Hastert er sakaður um að hafa greitt ónefndum aðila þrjár og hálfa milljón Bandaríkjadala eða tæplega 500 milljónir króna til að hylma yfir kynferðisbrot sem hann framdi.
Fréttamiðlar vestanhafs hafa sagt frá því að brotið hafi verið framið þegar Hastert starfaði sem kennari og glímuþjálfari, og er hann sagður hafa beitt karlkyns nemanda kynferðislegu ofbeldi. Þá er annar fyrrum nemandi hans sagður hafa sömu sögu að segja, en Hastert hefur ekki greitt honum. Hastert er giftur og á tvö börn.
Þá er Hastert einnig sakaður um að hafa stundað ólögleg gjaldeyrisviðskipti til að forðast skýrsluskil. Rannsóknin hefur staðið yfir síðan 2013, en auk ákæru um brot á bankalögum er hann sakaður um að hafa logið ítrekað í yfirheyrslu í desember sl. og reynt að villa fyrir rannsakendum.
Hastert gegndi starfi forseta fulltrúadeildar þingsins frá 1999-2007 sem æðsti embættismaður repúblikanaflokksins á þingi, en enginn fulltrúi flokksins hefur gegnt starfinu jafn lengi í sögu Bandaríkjanna. Þegar hann sagði af sér hafði hann verið bendlaður við nokkur spillingarmál. Hastert starfar nú sem hagsmunavörður (e. lobbyist), en hann er 73 ára gamall.
Frétt mbl.is: Eyddi milljónum í að hylma yfir kynferðisbrot