Lögregla leitar nú þrettán ára stúlku sem hvarf frá heimili sínu í Nottinghamshire í Bretlandi á laugardaginn. Að sögn foreldra stúlkunnar, lét stúlkan sig hverfa eftir „minniháttar rifrildi“ um húsverk.
Foreldrar stúlkunnar komu fram á blaðamannafundi fyrr í dag þar sem þeir báðu dóttur sína, Amber Peat, um að koma heim. Samkvæmt frétt Sky News var fjölskyldan nýkomin heim úr fríi í Cornwall, þegar stúlkan hvarf, sem var að sögn foreldranna „frábært“.
„Við vorum í stofunni, og ég heyrði útidyrahurðinni skellt, og þá áttaði ég mig á því að ég sá hana hvergi, hún var bara horfin,“ sagði móðir stúlkunnar, Kelly Peat, á blaðamannafundinum í dag.
„Ef þú ert að horfa á þetta, eða ef einhver veit hvar hún er, sendið hana heim, gerið þið það,“ bætti hún við.
Stjúpfaðir stúlkunnar sagði á blaðamannafundinum að stúlkan nyti þess að lesa hafi ekki verið líkleg til þess að láta sig hverfa.
Lögreglumaðurinn Matt McFarlane er yfir rannsókninni á hvarfi stúlkunnar. Hann hefur staðfest að lögregla skoði nú þann möguleika að Amber sé að reyna að heimsækja líffræðilegan föður sinn, sem býr í Skotlandi.
Hún sást síðast í Mansfield hverfinu um klukkan 17:30 á laugardaginn og eru foreldrar stúlkunnar og yfirvöld áhyggjufull. Í gærkvöldi gengu íbúar Mansfield á milli húsa til þess að leita að stúlkunni. Jafnframt var leitað af henni í skóglendi. Lögregla telur möguleika á því að Amber sé enn nálægt heimili sínu en hún var hvorki með farsíma né pening á sér þegar hún hvarf.