Skaut ófríska dóttur sína

Tyrknesk kona á fertugsaldri skaut dóttur sína til bana eftir að hún komst að því að 17 ára dóttir hennar væri barnshafandi og komin þrjá mánuði á leið. Konan komst að því að dóttirin væri ófrísk eftir að hafa heimsótt nágranna sem greindu henni frá því.

Fram kemur í frétt AFP að konan, sem býr í borginni Nigde í suðurhluta Tyrklands, hafi því næst farið heim til sín, fundið byssu og skotið dóttur sína fimm sinnum. Farið var með stúlkuna á sjúkrahús en hún lést á leiðinni þangað. Konan var tekin höndum en fékk taugaáfall í kjölfarið og var í kjölfarið flutt á sjúkrahús. Málið er í rannsókn lögreglu.

Ofbeldi gegn konum er alvarlegt vandamál í Tyrklandi og hafa stjórnvöld reynt að sporna við því. Fram kemur í fréttinni að 286 konur hafi verið myrtar í landinu á síðasta ári. Það sem af er þessu ári hafa 134 konur verið myrtar.

• 1 blogg um fréttina

Bloggað um fréttina

• Kristin stjórnmálasamtök: "Heiðursmorð" eru stórglæpur