Kona sem fannst á götuhorni í Kaliforníu í Bandaríkjunum og glímir við minnisleysi og krabbamein hefur nú fundið fjölskyldu sína. Konan óttaðist að hún myndi deyja áður en hægt yrði að finna út hver hún væri, en nú hefur verið staðfest að konan heitir Ashley Menatta og er 53 ára gömul.
Grunur lék á því að konan, sem hefur verið kölluð Sam í fjölmiðlum, væri frá Ástralíu vegna hreimsins. Fjölskylda hennar hefur þó nú staðfest að hún er frá Kaliforníu.
Þegar slökkviliðsmenn fundu konuna fyrir um fimm mánuðum var hún varla með meðvitund. Í ljós kom að hún var alvarlega veik vegna krabbameins í eggjastokkum.
Stofnuð var facebooksíða í von um að finna einhvern sem þekkti konuna. Þá var hún einnig á lista Interpool yfir týnt fólk ásamt því að að allir helstu fjölmiðlar fjölluðu um leit hennar að uppruna sínum.
Það var frændi Menatta sem sá fjölmiðlaumfjallanirnar og hringdi í móður sína, sem hafði samband við yfirvöld. Nú er komið fram að konan fæddist í Pennsylvaníu og hefur búið víðs vegar um Bandaríkin, nú síðast í Carlsbad. Hún á systur í Colorado og Maryland.
Konan er með krabbamein í eggjastokkum á þriðja stigi. Læknar fjarlægðu æxli á stærð við blakbolta. Talið er að minnisleysið sem konan glímir við sé afleiðing krabbameinsins. Það hélt áfram að breiðast um líkamann þrátt fyrir lyfjameðferð og aðgerð og var konan hrædd um að finna ekki fjölskyldu sína áður en það yrði um seinan. Það er þó ljóst að bænum hennar hefur verið svarað.