Mexíkóski eiturlyfjabaróninn Joaquín „El Chapo“ Guzmán sem flúði úr fangelsi um helgina hótaði Donald Trump á Twitter eftir að hann var kominn út.
Trump hefur áður sagt að Guzmán sé „allt það sem er að Mexíkó“ og eftir að hann slapp úr fangelsinu sagðist hann geta lumbrað á honum.
Can you envision Jeb Bush or Hillary Clinton negotiating with 'El Chapo', the Mexican drug lord who escaped from prison? ....
— Donald J. Trump (@realDonaldTrump) July 13, 2015
...Trump, however, would kick his ass!
— Donald J. Trump (@realDonaldTrump) July 13, 2015
Eftir tíst milljarðamæringsins og forsetaframbjóðandans birtist svar á Twitter-síðu El Chapo þar sem hann skrifaði: „ef þú heldur áfram að pirra mig mun ég láta þig éta orðin þín helvítið þitt.“
Samkvæmt frétt New York Daily News hafði Trump samband við alríkislögreglu Bandaríkjanna (FBI) sem rannsakar nú hótunina, en talið er að sonur El Chapo sjái um Twitter-aðganginn.
Guzman flúði úr fangelsi fyrir utan Mexíkóborg en öryggisgæsla þar er meiri en gengur og gerist. Þetta er í annað skiptið á fjórtán árum sem Guzman flýr úr fangelsi.
Guzman flúði fyrst úr fangelsi árið 2001 en slapp úr haldi með því að fela sig í þvottakörfu. Það var ekki fyrr en í febrúar í fyrra sem hann var handtekinn á ný af hermönnum í Mazatlan, sem er á vesturströnd Mexíkó, en svæðið er vinsæll ferðamannastaður.
Guzmán flúði í gegnum löng göng sem eiga upptök sín undir sturtunni í fangaklefa hans. Eftir að hann hvarf sjónum kom í ljós að hola, tíu metra djúp, undir sturtunni. Hafði stiga verið komið fyrir í holunni. Göngin eru 1,5 km að lengd með loftræstingu og ljósakerfi en um er að ræða byggingu í öryggisfangelsinu sem verið er að gera upp.
Vélhjól fannst í göngunum og er talið að það hafi verið notað til þess að flytja verkfæri inn í göngin og jarðveg úr göngunum. Göngin eru 1,7 metri á hæð og um 80 cm víð. Þegar hefur verið ákveðið að yfirheyra átján fangaverði af saksóknara vegna málsins.
Guzman, sem stýrði Sinaloa-glæpasamtökunum, var álitinn hættulegasti glæpamaður Mexíkó og höfðu bandarísk yfirvöld sett fimm milljónir Bandaríkjadala til höfuðs honum. Guzman er sagður standa á bak við meirihluta þeirra ofbeldisverka sem hafa verið framin í Mexíkó í tengslum við fíkniefnaviðskipti á undanförnum árum.