För um 37 þúsund flóttamanna hefur verið stöðvuð í Ermarsundsgöngunum á þessu ári. Flóttafólkið reynir að komast frá Frakklandi til Bretlands. Rekstraraðilar ganganna segjast hafa eytt 13 milljónum evra, tæpum 2 milljörðum króna, í að efla öryggisgæslu og öryggismál almennt, vegna þessa.
Um 2.000 flóttamenn reyndu að komast inn í Ermarsundsgöngin í nótt í frönsku hafnarborginni Calais til Englands. Einn flóttamannanna fannst látinn í morgun.
„Sá þrýstingur sem við finnum nú fyrir hverja nótt er meiri en við ráðum við með góðu móti,“ segir í yfirlýsingu frá rekstraraðilum Ermarsundsganganna. „Þetta kallar á viðeigandi viðbrögð ríkjanna,“ segir ennfremur og er orðunum beint til Breta og Frakka.