Erlent | mbl | 3.9.2015 | 16:04

Tók ræningjann hengingartaki

Skjáskot úr myndbandinu.

Þessi seinheppni ræningi í borginni Açailândia í Brasilíu átti ekki von á þeirri útreið sem hann fékk hjá Monique Bastos þegar hann ætlaði að ræna hana. Ræningjanum til lítillar lukku er Bastos þrautþjálfuð í jiu jitsu og var á leiðinni á æfingu.

Hún segir að ræningjarnir tveir hafi komið að henni á mótorhjóli og heimtað símana þeirra. Þegar hún áttaði sig á því að þeir voru óvopnaðir lyfti hún afturhjólinu á mótorhjólinu þeirra og felldi hjólið.

Bastos, sem hefur barist í sex atvinnumannabardögum í MMA, náði fótalás utan um háls árásarmannsins og dró hann á gangstéttina þangað til lögreglan kom kortéri síðar. Eins og sést á þessum myndbandi var ræninginn allt annað en sáttur við þessa meðferð. Á myndbandinu sést hins vegar að Monique Bastos virðist skemmta sér ágætlega.